A sak hming Munirka, a mawi chuang ngei e.. Zo hnahthlak chi hrang hrangin; Delhi-a veng dang ngai leh awt lova tual an chaina hmun. Han bel chiang teh ang aw….
Munirka-ah hian i hausa emaw i rethei emaw, i changkang emaw changkanglo emaw, i huai emaw huailo emaw , i thau emaw thaulo emaw intluktlang vekin a lo hrut rual ang che (lenglo an awmlo)… I pachhiat avang khan rawn tlawh hreh suh.. Millionaire nen in kawng zawh, in boruak hip a in ang vek dawn.. Anupam lam atanga i rawn kal a nih chuan, ngaiteh, mi an lo phut lui lui paw’n mak ti suh..a mi cheng hmun 100 /1 pawh ila hmulo tih kha hre phawt mai la. "Kawng a va chhe ve," i ti a ni maithei, a chhia a ni lo, hmasawn reng anih avang hian a tha zing lutuk zawk mai a ni. Ngaiteh, hnam hrang hrang, tawng hrang hrang hmang i hriat paw’n mak ti suh, Munirka hian tawng hrang leh hnam hrang a thliar ve lova, kan leng vek a ni.. Tin, neihloh a nei lova, awmlo a awm heklo, engkim a awm veks... awmlo thlengin kan nei a ni tih i hriat hun chuan, mak i ti thung maithei. Mahse, Delhi-a veng intodelh ber a ni tih i hriat hun erawh chuan i ngaisang thung ngei ang.
Fur lai a, kawng dung a tui hawk luang dum dum i hmuh paw’n, "E HE?" ti mai suh. Hei hi a ni, Two in One (Kawng + Luikawr) an tih awmzia chu, Practical-a i tawn a vangin i vannei hle zawk a ni, dai pawp pawp ang che. Tin, i luh ril deuh chuan, an chhuan em em, Munirkians’ Airport i rawn hmu ang. Thlawhna tum i hmuh loh paw’n makti chuanglo la, a tum ngailo hrim hrim zawk a ni tih hria la. Helai hi Air-port practical-a i hmuh vawikhatna chu a ni leh ang. Boruak thianghlim hmuh hi Munirkians’ hian kan ngaisang a, Air rawn luhna tur Port, a hranpa ngatin kan nei zawk a ni tih i hriat hunah chuan, ani…hmuthei a i awm avangin lawmthu sawi mawlh mawlh ang che. Hei mai bakah hian, Zoram lampanga kan Dawr hmuh ang chi i hmuh hunah, i tlangnel sawt bawk ang. Chawhmeh rep chi tin, hmawmsawm chi hrang hrang, Kuhva- hring leh Sachek thlenga lei tur i hmuh dawn avangin..
Zofa chengte hi han bel chiang la… engkima a ber thiau an ni tih mi mawl ber i nih paw’n i hre nghal thei ang. Delhi Zofate zinga hlimthei ber, in lungrual ber, zaktheilo ni si lo va, zaklo-thei ber, mahni kova tla hlen thin thiau kan ni tih i mit ngeia i hmuh dawn avangin..i va han vannei fal bik dawn em! A ni, tlemte mah ni ila, khawvelin 'Talent' an tih ang chi hi chu kan nei kim biai thung si a ni, Kan hnenah hian awm la, Sappui zirna sang i ngai bik lo’ng. Kan induhsak tawna, kan hlimtheih em avang hian kan kianga i awm phawt chuan Vitamin ‘C’ an tih hi i tan sum senga lei a ngai hek lovang.
Kan bial inkhawm te hi han bih teh, aw mihring,Thlarau piah lama tisaa hlawkna i neih nghal dawn avangin dam manhla i va ti dawn em!! Thinrim miah si lo, midang er chuang lo, in el zawka sawihona kan neih thinte hi, i tan chuan kum 1 bial danga inkhawm aiin a hlu zawk dawn si a.. I tan chuan Munirka a rawn kal hi HLEP HLANG a nih dawn avangin, rei rial lovin rawn leng la, hun tha i neih lai hian….
No comments:
Post a Comment